សាលាដំបូងរាជធានីភ្នំពេញសម្រេចផ្តន្ទាទោសជនល្មើសរំលោភសេពសន្ថវៈកុមារដែលកម្ពុជាកំពុងតាមចាប់ខ្លួន ពីបទរំលោភសេពសន្ថវៈកុមារ បទឆបោក និងបទរំលោភលើសិទ្ធិអំណាច
សាលាដំបូងរាជធានីភ្នំពេញបានប្រកាសសាលក្រមជាប្រវត្តិសាស្ត្រដើម្បីការពារសិទ្ធិ និងការពារកុមារក្នុងសំណុំរឿងប្រឆាំងនឹងលោក សុធា អរុណ អតីតនាយកប្រតិបត្តិអង្គការ សុវណ្ណកុមារ និងបក្ខពួកគឺលោក ហ៊ុន ចិន្តា អ្នកស្រី ថៃ ស៊ីនួន និងអ្នកស្រី អ៉ឹង វាសនា និមល។ លោក សុធា អរុណ ត្រូវបានតុលាការកាត់ទោសពីបទ រំលោភសេពសន្ថវៈលើកុមារពីររូប បទឆបោក បទហឹង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ និងបង្អត់អាហារ ឬគ្មានការថែទាំចំពោះអនីតិជនអាយុតិចជាង១៥ឆ្នាំ។ លោក សុធា អរុណ ត្រូវបានតុលាការផ្ដន្ទាទោសដាក់ពន្ធនាគារសរុប ២២ឆ្នាំ។
សាលក្រមនៃបទរំលោភសេពសន្ថវៈ និងបទហឹង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ ត្រូវបានប្រកាសនៅតុលាការនៅថ្ងៃទី៣ ខែឧសភា ឆ្នាំ២០២៣ និងសាលក្រមនៃបទឆបោក ត្រូវបានប្រកាសនៅតុលាការនៅថ្ងៃទី២២ ខែមិនា ឆ្នាំ២០២៣។ តុលាការបានចេញសាលក្រមជាលាយលក្ខណ៍អក្សរក្នុងពេលថ្មីៗនេះ។
សំណុំរឿងរំលោភសេពសន្ថវៈ
លោក សុធា អរុណ ត្រូវបានតុលាការកាត់ទោសពីបទរំលោភសេពសន្ថវៈលើកុមារីពីររូបដែលស្នាក់នៅក្នុងអង្គការ សុវណ្ណកុមារ។ លោក សុធា អរុណ ត្រូវបានកាត់ទោសឱ្យជាប់ពន្ធនាគាររយៈពេល ៨ ឆ្នាំក្នុងមួយករណីនៃបទរំលោភសេពសន្ថវៈ។ ក្នុងសំណុំរឿងរំលោភសេពសន្ថវៈទាំងពីរករណី មានមួយករណីដែល លោក សុធា អរុណ ត្រូវសងថ្លៃខូចខាតចំនួន ៦០.០០០.០០០ (ហុកសិបលាន) រៀល ដល់ជនរងគ្រោះដែលរងការរំលោភបំពានផ្លូវភេទម្តងហើយម្តងទៀត តាំងពីនាងមានអាយុ ៦ ឆ្នាំ។
សំណុំរឿងហិង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ
លោក សុធា អរុណ ត្រូវបានតុលាការកាត់ទោសឱ្យជាប់ពន្ធនាគាររយៈពេល ៤ ឆ្នាំ ពីបទអំពើហិង្សាលើកុមារ នៅក្នុងអង្គការ សុវណ្ណ កុមារ។ លោក ហ៊ុន ចិន្តា និងអ្នកស្រី ថៃ ស៊ីនួន ដែលជាឪពុកម្តាយចិញ្ចឹមនៅក្នុងអង្គការ សុវណ្ណកុមារ ត្រូវផ្តន្ទាទោសដាក់ពន្ធធនាគាររយៈពេល ៣ ឆ្នាំ ម្នាក់ និងអ្នកស្រី អ៉ឹង វាសនានិមល ជាម្តាយចិញ្ចឹមម្នាក់ទៀតត្រូវផ្តន្ទាទោសដាក់ពន្ធនាគាររយៈពេល ២ ឆ្នាំ ៦ ខែ។ សាលក្រមចំពោះលោកសុធា អរុណ លោកហ៊ុន ចិន្តា អ្នកស្រីថៃ ស៊ីនួន និងអ្នកស្រី អ៉ឹង វាសនា និមល ពីបទហឹង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ ។ លោកសុធា អរុណ ក៏ត្រូវបានតុលាការផ្តន្ទាទោសពីបទ បង្អត់អាហារ និង គ្មានការថែទាំ
អនីតិជនអាយុតិចជាង ១៥ឆ្នាំ។ តុលាការបានបង្គាប់ឱ្យលោក សុធា អរុណ លោក ហ៊ុន ចិន្តា អ្នកស្រី ថៃ ស៊ីនួន និងអ្នកស្រី អ៉ឹង វាសនា និមល រួមគ្នាសងថ្លៃខូចខាតចំនួន ២០០.០០០.០០០ (ពីររយលាន) រៀល។
សំណុំរឿងឆបោក
លោក សុធា អរុណ ត្រូវបានតុលាការផ្ដន្ទាទោសដាក់ពន្ធនាគាររយៈពេល ២ ឆ្នាំ ពីបទឆបោក។ ចំណែកឯបក្ខពួករបស់លោក គឺអ្នកស្រី ពៅ ស្រីមុំ ត្រូវជាភរិយារបស់លោក សុធា អរុណ និងលោកស្រី ជាតិ ចាន់មរកត ជាអតីតគណនេយ្យកររបស់អង្គការ សុវណ្ណកុមារ ត្រូវបានផ្ដន្ទាទោសម្នាក់ៗឱ្យជាប់ពន្ធនាគាររយៈពេល ១៨ ខែពីបទឆបោក។ ជនជាប់ចោទទាំងបីត្រូវសងជំងឺចិត្តដល់អង្គការ សុវណ្ណកុមារ ក្នុងទឹកប្រាក់ចំនួន ១.៤៦២.៣៤៩ (មួយលានបួនសែនហុកសិបពីរពាន់ និងបីរយសែសិបប្រាំបួន) ដុល្លារអាមេរិក។
លោក សុធា អរុណ និងបុគ្គលិករបស់លោក ត្រូវបានគេរកឃើញថា បានរំលោភបំពានរាងកាយ និងផ្លូវភេទលើកុមារក្នុងអង្គការ សុវណ្ណកុមារ ក្នុងខណៈដែលខ្លួនរស់នៅបែបស៊ីវីល័យដោយសារ
ការលួចលុយពីអង្គការ សុវណ្ណកុមារ ដែលទុកសម្រាប់ផ្គត់ផ្គង់កុមារកំព្រា និងកុមារដែលបោះបង់ចោលយកមកប្រើប្រាស់ជាប្រយោជន៍ផ្ទាល់ខ្លួន។
ក្នុងអំឡុងពេលដែលលោក សុធា អរុណ ធ្វើការនៅក្នុងអង្គការនេះ លោកបានសាងសង់ផ្ទះវីឡាធំមួយ និងបានសង់អាងហែលទឹកដែលមានតម្លៃ ២២.០០០ (ពីរម៉ឺនពីរពាន់) ដុល្លារអាមេរិក និងបន្ទប់ខារ៉ាអូខេ ដោយប្រើថវិការបស់អង្គការ។ លោក សុធា អរុណ ក៏បានប្រើប្រាស់ផងដែរនូវមូលនិធិរបស់ម្ចាស់ជំនួយដើម្បីទិញអចលនទ្រព្យផ្ទាល់ខ្លួន និងបណ្តាក់ទុនលើអាជីវកម្មមួយចំនួន។ លោក សុធា អរុណ បង្កើតអាណាចក្រអចលនទ្រព្យក្នុងអំឡុងពេលដែលលោកបានឆបោកថវិកាជាច្រើនពីអង្គការ សុវណ្ណកុមារ រួមមានផ្ទះវីឡាប្រណីតផ្ទាល់ខ្លួន ចំការកៅស៊ូក្នុងខេត្តមណ្ឌលគិរី និងដីនៅតាមខេត្តជាច្រើនទូទាំងប្រទេស។ លោក សុធា អរុណ បានប្រើប្រាស់បុគ្គលិក និងទ្រព្យសម្បត្តិរបស់អង្គការ ដើម្បីជាទ្រព្យសម្បត្តិរបស់ខ្លួន ហើយគណនី ហ្វេសប៊ុកផ្ទាល់ខ្លួនរបស់គ្រួសារលោក សុធា អរុណ បង្ហាញរូបថតនៃការរស់នៅដ៏ប្រណីត រួមទាំងពិធីជប់លៀងអាងហែលទឹកសម្រាប់ក្មេងៗមួយចំនួនដែលលោកពេញចិត្តនៅឯវីឡាដ៏ធំរបស់លោក។
ការស៊ើបអង្កេតបានរកឃើញករណីនៃការរំលោភបំពានលើរាងកាយដ៏គួរឱ្យរន្ធត់ រួមទាំងករណីព្យួរកុមារជាមួយកង្ហារជាប់ពិដាន និងការបង្អត់អាហារកុមារពីររូបដោយចេតនាអស់រយៈពេល ៣ សប្តាហ៍ ក៏ដូចជាការរំលោភបំពានផ្លូវភេទលើកុមារអាយុ ៦ ឆ្នាំ ហើយមានបុគ្គលិកផ្សេងៗជាច្រើនដែលមានពាក់ព័ន្ធក្នុងសកម្មភាពរំលោភបំពានផ្លូវភេទកុមារ។ ការរំលោភបំពាននេះបានកើតឡើងអស់រយៈពេលជាច្រើនឆ្នាំ ហើយលោក សុធា អរុណ ដែលជាជនបោកប្រាស់ដ៏មានជំនាញ និងមេដឹកនាំមនោគមបានចាត់វិធានការជាច្រើនដើម្បីលាក់បាំងពីបទឧក្រិដ្ឋកម្មទាំងនេះ។
លោក Bradley J. Gordon អ្នកតំណាងស្របច្បាប់របស់ អង្គការ សុវណ្ណកុមារ បានមានប្រសាសន៍ថា “យើងខ្ញុំជឿជាក់ថា សាលាដំបូងរាជធានីភ្នំពេញនឹងរកយុត្តិធម៌ឱ្យយើងខ្ញុំ ហើយសូមកោតសរសើរដល់ប្រជាជនកម្ពុជាដែលបម្រើការងារក្នុងជួររាជរដ្ឋាភិបាល ដែលបានទទួលស្គាល់ថា ទង្វើរបស់លោក សុធា អរុណ និងអ្នកបក្ខពួកទាំងអស់របស់លោក សុធា អរុណ ជាទង្វើដែលហួសហេតុ និងគួរឱ្យស្អប់ខ្ពើម។ កុមារមិនអាចការពារខ្លួនរបស់ពួកគេពីទង្វើរបស់ជនល្មើសបានទេ ដូចនេះយើងខ្ញុំជឿជាក់យ៉ាងមុតមាំថា ការដាក់ទោសជនល្មើស គឺពិតជាសមហេតុផល និងត្រឹមត្រូវបំផុត។ យើងខ្ញុំសង្ឈឹមថា រឿងក្តីទាំងនេះ នឹងជួយបង្កើនការយល់ដឹងបន្ថែមទៀត ព្រមទាំងពង្រឹងនូវការការពារចំពោះកុមារ”។ លោកបានបន្ថែមទៀតថា “ប្រទេសកម្ពុជាបានឆ្លងកាត់សង្គ្រាមស៊ីវិល និងសង្គ្រាមប្រល័យពូជសាសន៍ អស់រយៈពេល ៣០ ឆ្នាំ ហេតុដូច្នេះកម្ពុជាមានទំនួលខុសត្រូវចាំបាច់ក្នុងកិច្ចការពារដល់កុមារ។ បទល្មើសដ៏គួរឱ្យរន្ធត់នេះ ចាំបាច់ត្រូវទទួលបានយុត្តិធម៌ដ៏ត្រឹមត្រូវមួយ ហើយយើងខ្ញុំជឿជាក់ថា ការកាត់ទោសរបស់តុលាការ គឺមានសារៈសំខាន់ខ្លាំងណាស់សម្រាប់សង្គមដើម្បីបង្ហាញពីការជាសះស្បើយពីរបួសដែលបានកើតឡើងក្នុងអតីតកាល។ ចំពោះករណីដែល ក្មេងប្រុសពីរនាក់ត្រូវបានលោក សុធា អរុណ និងបក្ខពួក បង្អត់អាហារអស់រយៈពេល ៣ សប្តាហ៍ និងករណីដែលក្មេងស្រីអាយុ ៦ឆ្នាំម្នាក់ត្រូវបានលោក សុធា អរុណ រំលោភសេពសន្ថវៈ តែងលងបន្លាចយើងគ្រប់គ្នាជារៀងរាល់ថ្ងៃ ដែលទង្វើដ៏អាក្រក់បែបនេះមិនគួរកើតមានឡើង និងមិនត្រូវកើតមានសារជាថ្មីឡើយ។ សេចក្តីសម្រេចរបស់តុលាការនេះគ្រាន់ជាការចាប់ផ្តើមតែប៉ុណ្ណោះ។ នៅមានការងារជាច្រើនទៀតដែលត្រូវធ្វើ ដើម្បីការពារកុមារទាំងឡាយ ជាពិសេសទាក់ទងទៅនឹងតម្រូវការក្នុងការការពារដល់កុមារនៅក្នុងប្រទេសកម្ពុជា និងទប់ស្កាត់មិនឱ្យមានបទល្មើសបែបនេះកើតឡើងសារជាថ្មី។ យើងខ្ញុំប្តេជ្ញាចិត្តនឹងធ្វើការជាមួយរាជរដ្ឋាភិបាលកម្ពុជាដើម្បីធានាបាននូវការការពារដល់កុមារកម្ពុជាឱ្យបានកាន់តែប្រសើរឡើង”។
អង្គការ សុវណ្ណកុមារ ជាមណ្ឌលកុមារកំព្រាមិនស្វែងរកប្រាក់ចំនេញមានទីតាំងស្ថិតក្នុងទីក្រុងភ្នំពេញ បង្កើតឡើងក្នុងឆ្នាំ ២០០៣ ដោយលោកស្រី Elizabeth Ross Johnson ដើម្បីផ្តល់នូវលំនៅស្ថានដែលប្រកបដោយសុវត្ថិភាព និងការចិញ្ចឹមបីបាច់ថែរក្សាដល់កុមារដែលត្រូវការជំនួយ។ ក្នុងរយៈពេលប៉ុន្មានឆ្នាំកន្លងមកនេះ អង្គការ សុវណ្ណកុមារ បានមើលថែទាំកុមារចំនួន ៥៥ នាក់។
លោក Bradley J. Gordon បានបន្ថែមទៀតថា “យើងខ្ញុំសូមថ្លែងអំណរគុណដល់អាជ្ញាធរកម្ពុជា ជាពិសេសដល់អ្នកដែលបានជ្រោមជ្រែងដល់សិទ្ធិកុមារ។ យើងខ្ញុំក៏សូមថ្លែងអំណរគុណផងដែរចំពោះ បុគ្គលិក អ្នកស្ម័គ្រចិត្ត និងអ្នកគាំទ្រទាំងអស់ដែលបានប្តេជ្ញាចិត្តយ៉ាងមុតមាំក្នុងការជួយការពារដល់កុមារក្នុងអង្គការសុវណ្ណកុមារ និងហ៊ានលើកឡើងអំពីបទល្មើសដែលបានកើតឡើងទៅកាន់តុលាការ។ ក្នុងអំឡុងពេលប៉ុន្មានឆ្នាំមុន មនុស្សជាច្រើនបានប្រឈមនឹងគ្រោះថ្នាក់ ដោយលោក សុធា អរុណ បានគម្រាមកំហែងដល់អាយុជីវិតនៅពេលបុគ្គលទាំងអស់នោះឡើងធ្វើជាសាក្សីចំពោះមុខតុលាការ។ ការគាំទ្រពីគ្រួសារ Johnson បានដើរតួយ៉ាងសំខាន់ក្នុងការរកឃើញនូវភាពមិនប្រក្រតីក្នុងអង្គការ សុវណ្ណកុមារ។”
នាពេលបច្ចុប្បន្ន លោក សុធា អរុណ និងបក្ខពួកទាំងអស់នៅតែមានសេរីភាព បើទោះបីជាមានការកាត់ទោសពីតុលាការក៏ដោយ។