ជនល្មើសរំលោភសេពសន្ថវៈកុមារ និងឆបោក ដែលកម្ពុជាកំពុងតាមចាប់ខ្លួន តែនៅដើរហើរដោយសេរីទោះបីជាមានការសម្រេចផ្តន្ទាទោស
អត់រយៈពេលជាងមួយខែហើយ ដែលសាលាដំបូងរាជធានីភ្នំពេញ បានប្រកាសផ្តន្ទាទោសជាប្រវត្តិសាស្រ្តលើ លោក សុធា អរុណ អតីតនាយកប្រតិបត្តិអង្គការ សុវណ្ណកុមារ និងបក្ខពួក គឺលោក ហ៊ុន ចិន្តា អ្នកស្រី ថៃ ស៊ីនួន អ្នកស្រី អ៉ឹង វាសនា និមល អ្នកស្រី ពៅ ស្រីមុំ និងអ្នកស្រី ជាតិ ច័ន្នមរកត។ លោក សុធា អរុណ ត្រូវបានតុលាការកាត់ទោសពីបទ រំលោភសេពសន្ថវៈលើកុមារពីររូប បទឆបោក បទប្រើហឹង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ និងបង្អត់អាហារ ឬគ្មានការថែទាំចំពោះអនីតិជនអាយុតិចជាង១៥ឆ្នាំ។ បើទោះបីជាមានដីកាចាប់ខ្លួនភ្លាមៗក៏ដោយ ការទាមទាររកយុត្តិធម៌មួយនេះទទួលបានការភ្ញាក់ផ្អើលយ៉ាងខ្លាំង ពីសំណាក់សាធារណជន និងជនរងគ្រោះ ដោយហេតុ លោក សុធា អរុណ និងបក្ខពួកនៅមិនទាន់ត្រូវបានចាប់ខ្លួននៅឡើយទេ។
ការផ្តន្ទាទោសពីតុលាការលើជនល្មើស លោក សុធា អរុណ ពីបទនានាជាច្រើនដូចជា បទរំលោភសេពសន្ថវៈ បទប្រើហឹង្សាលើកុមារ និងបទឆបោក ទាំងនេះបានបង្ហាញ សារយ៉ាងរឹងមុំាមួយអំពីសារៈសំខាន់នៃការការពារកុមារ និងសិទ្ធិរបស់ពួកគាត់។ ត្បិតតែជនល្មើសសមប្រឈមនឹងបទឧក្រិដ្ឋ ប៉ុន្តែលោក សុធា អរុណ និងបក្ខពួកនៅបន្តគេចពីការចាប់ខ្លួនយ៉ាងសេរី ដែលនាំឱ្យសាធារណជនមានការព្រួយបារម្ភជាខ្លាំងអំពីប្រសិទ្ធភាពរបស់ប៉ូលីសក្នុងការអនុវត្តយុត្តិធម៌។
លោក Brad Gordon មេធាវីតំណាងស្របច្បាប់របស់ អង្គការ សុវណ្ណកុមារ មានប្រសាសន៍ថា “យើងមានការខកចិត្តយ៉ាងខ្លាំងដែលលោក សុធា អរុណ និងបក្ខពួកនៅតែមានសេរីភាព បើទោះបីជាមានសាលក្រម និងការផ្តន្ទាទោសពីតុលាការក៏ដោយ។ កុមាររងគ្រោះ បានស៊ូទ្រាំនឹងការឈឺចាប់ និងរងរបួសយ៉ាងធ្ងន់ធ្ងរ ហើយនៅមិនទាន់ទទួលបាននូវយុត្តិធម៌នៅឡើយទេ វាចាំបាច់ណាស់ ដែលពួកគាត់ត្រូវទទួលបានយុត្តិធម៌ពេញលេញ និង ជនល្មើសត្រូវទទួលការផ្តន្ទាទោសពេញលេញដូចគ្នា។ យើងជំរុញឱ្យប៉ូលីសចាត់វិធានការជាបន្ទាន់ និងធានាថាជនល្មើសក្រោមការផ្តន្ទាទោសត្រូវបានចាប់ខ្លួនភ្លាមៗ ហើយចាប់ផ្តើមកាត់ទោសពួកគេ"។
ការយឺតយ៉ាវក្នុងការចាប់ខ្លួនលោក សុធា អរុណ និងបក្ខពួក ធ្វើឱ្យប៉ះពាល់ដល់ទំនុកចិត្តរបស់សាធារណជនក្នុងប្រព័ន្ធយុត្តិធម៌ និងធ្វើឱ្យប៉ះពាល់ដល់សុវត្ថិភាពជនរងគ្រោះ និងអ្នកពាក់ព័ន្ធដែលអាចកើតមាននាពេលអនាគត។
សំណុំរឿងប្រឆាំងនឹងលោក សុធា អរុណ និងបទឧក្រិដ្ឋដែលប្រព្រឹត្តនៅអង្គការ សុវណ្ណកុមារ បានបង្ហាញពីតម្រូវការបន្ទាន់សម្រាប់ការការពារដ៏រឹងមាំសម្រាប់កុមារនៅកម្ពុជា។ ករណីនេះបានលាតត្រដាងពីភាពងាយរងគ្រោះ ដែលកុមារដែលអាចនឹងប្រឈមមុខ។ ការផ្តន្ទាទោសជនល្មើស លោក សុធា អរុណ និងបក្ខពួក គួរតែដើរតួជាកត្តាជំរុញឱ្យមានការកែទម្រង់គ្រប់ជ្រុងជ្រោយ សំដៅទប់ស្កាត់បទឧក្រិដ្ឋដ៏អាក្រក់បែបនេះកុំឱ្យកើតឡើងម្តងទៀត។
លោក Brad Gordon បន្ថែមទៀតថា “ខណៈពេលដែលយើងទទួលស្គាល់វឌ្ឍនភាពដែលបានធ្វើឡើងជាមួយនឹងការផ្តន្ទាទោស យើងក៏ទទួលស្គាល់ថា មានការងារជាច្រើនទៀតដែលយើងត្រូវធ្វើ ដើម្បីបង្កើតសុវត្ថិភាពសម្រាប់កុមារនៅកម្ពុជា"។
ព័ត៍មានបន្ថែមអំពីបទឧក្រិដ្ឋរបស់លោក សុធា អរុណ និងបក្ខពួក៖
សំណុំរឿងរំលោភសេពសន្ថវៈ
លោក សុធា អរុណ ត្រូវបានតុលាការកាត់ទោសពីបទរំលោភសេពសន្ថវៈលើកុមារីពីររូបដែលស្នាក់នៅក្នុងអង្គការ សុវណ្ណកុមារ។ លោក សុធា អរុណ ត្រូវបានកាត់ទោសឱ្យជាប់ពន្ធនាគាររយៈពេល ៨ ឆ្នាំក្នុងមួយករណីនៃបទរំលោភសេពសន្ថវៈ។ ក្នុងសំណុំរឿងរំលោភសេពសន្ថវៈទាំងពីរករណី មានមួយករណីដែល លោក សុធា អរុណ ត្រូវសងថ្លៃខូចខាតចំនួន ៦០.០០០.០០០ (ហុកសិបលាន) រៀល ដល់ជនរងគ្រោះដែលរងការរំលោភបំពានផ្លូវភេទម្តងហើយម្តងទៀត តាំងពីនាងមានអាយុ ៦ ឆ្នាំ។
សំណុំរឿងហិង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ
លោក សុធា អរុណ ត្រូវបានតុលាការកាត់ទោសឱ្យជាប់ពន្ធនាគាររយៈពេល ៤ ឆ្នាំ ពីបទអំពើហិង្សាលើកុមារ នៅក្នុងអង្គការ សុវណ្ណ កុមារ។ លោក ហ៊ុន ចិន្តា និងអ្នកស្រី ថៃ ស៊ីនួន ដែលជាឪពុកម្តាយចិញ្ចឹមនៅក្នុងអង្គការ សុវណ្ណកុមារ ត្រូវផ្តន្ទាទោសដាក់ពន្ធធនាគាររយៈពេល ៣ ឆ្នាំ ម្នាក់ និងអ្នកស្រី អ៉ឹង វាសនានិមល ជាម្តាយចិញ្ចឹមម្នាក់ទៀតត្រូវផ្តន្ទាទោសដាក់ពន្ធនាគាររយៈពេល ២ ឆ្នាំ ៦ ខែ។ តុលាការបានបង្គាប់ឱ្យលោក សុធា អរុណ លោក ហ៊ុន ចិន្តា អ្នកស្រី ថៃ ស៊ីនួន និងអ្នកស្រី អ៉ឹង វាសនា និមល រួមគ្នាសងថ្លៃខូចខាតចំនួន ២០០.០០០.០០០ (ពីររយលាន) រៀល។
សំណុំរឿងឆបោក
លោក សុធា អរុណ ត្រូវបានតុលាការផ្ដន្ទាទោសដាក់ពន្ធនាគាររយៈពេល ២ ឆ្នាំ ពីបទឆបោក។ ចំណែកឯបក្ខពួករបស់លោក គឺអ្នកស្រី ពៅ ស្រីមុំ ត្រូវជាភរិយារបស់លោក សុធា អរុណ និងលោកស្រី ជាតិ ចាន់មរកត ជាអតីតគណនេយ្យកររបស់អង្គការ សុវណ្ណកុមារ ត្រូវបានផ្ដន្ទាទោសម្នាក់ៗឱ្យជាប់ពន្ធនាគាររយៈពេល ១៨ ខែពីបទឆបោក។ ជនជាប់ចោទទាំងបីត្រូវសងសំណងខូចខាតដល់អង្គការ សុវណ្ណកុមារ ក្នុងទឹកប្រាក់ចំនួន ១.៤៦២.៣៤៩ (មួយលានបួនសែនហុកសិបពីរពាន់ និងបីរយសែសិបប្រាំបួន) ដុល្លារអាមេរិក។
លោក សុធា អរុណ ត្រូវបានតុលាការផ្ដន្ទាទោសដាក់ពន្ធនាគារសរុប ២២ឆ្នាំ។
អង្គការ សុវណ្ណកុមារ ជាអង្គការក្រៅរដ្ឋាភិបាលអន្តរជាតិ ដែលប្រកាន់ជំហរយ៉ាងម៉ឺងម៉ាត់ក្នុងការផ្តល់លំនៅប្រកបដោយសុវត្ថិភាព និងការចិញ្ចឹមបីបាច់ដល់កុមារដែលខ្វះខាត។
អង្គការ សុវណ្ណកុមារ អិលអិលស៊ី បន្តសហការជាមួយអង្គការក្នុងស្រុក និងអន្តរជាតិ ក្នុងការ ជំរុញឱ្យអាជ្ញាធរកម្ពុជាចាត់វិធានការជាបន្ទាន់ ដើម្បីចាប់ខ្លួន និងកាត់ទោសលោក សុធា អរុណ និងបក្ខពួក។ អង្គការនឹងបន្តតស៊ូការពារកុមារ និងការពារយុត្តិធម៌នៅក្នុងករណីទាំងនេះ និងផ្សេងៗទៀត។
